الأخ العزيز / djvampire ( وإن كنت أنا شخصيا معترض علي هذا الإسم )
بعد التحية
طبعا إنت رايح علي شركة مقاولات في السعودية … وبالتأكيد إن هذه الشركة لديها نظام محاسبي قائم وكادر محاسبي موجود
بالتالي إنت ما عليك سوي إنك تعتبر نفسك ترس في هذا النظام وهم أكيد عارفين إنك جاي من مصر ماتعرفش حاجة يعني هم هيعلموك كل شي واحدة واحدة
بس أنا أحب أعطيك بعض المقويات ( علي رأي زميلنا العزيز ) في مجال المقاولات
شوف ياحبيبي : -
محاسب المقاولات إما إنه يكون محاسب في مشروع ( محاسب مشروع يعني ) وبالتالي مش هيكون عندك برنامج محاسبي في المشروع لأن معظم شركات المقاولات هنا في السعودية تعتمد علي المركزية في كل شي
يعني لا هتعمل قيود ولا شي … وكل المهام الخاصة بمحاسب المشروع أحصرها لك في الآتي
1 - إعداد كشوف تسوية العهدة النقدية للموظفين
2 - مراقبة كروت الدوام ( يعني الحضور والإنصراف ) للموظفين
3 - عمل مطابقات شهرية مع المقاولين … يعني المركز الرئيسي هيبعت لك كشف حساب مقاول مثلا وإنت تتصل علي المقاول وتطلب منه كشف حساب وتحط الكشفين جنب بعض وتطابقهم … إذا تطابقوا مافيش مشكلة وإذا اختلفوا تشوف الفرق فين وتبحث أن أسبابه وتعالجه وتبعت مذكرة بالكلام هذا إلي مكتبك الرئيسي
أو بطريقة تانية … هتلاقي في شركتك نموذج إسمه مطابقة حساب هتكتب فيه اسم المقاول أو المورد وهتكتب فيه رصيده عندكم كام وهتبعته له علي الفاكس أو بالبريد . اذا كان الرصيد مطابق هو هيكتب في هذا النموذج مايفيد ذلك وهيختمه وهيرسله لك مرة ثانية ، واذا كان غير مطابق هيكتب لك الرصيد الصحيح ( طبقا لحساباته طبعا ) وهيرسله لك مرة ثانية وعليك انت بقي إنك تعرف كيف تكتشف سبب اختلاف رصيد الحساب بينك وبينه وتعمل تقرير ( مذكرة داخلية ) وترسله لمكتبك الرئيسي وهم هيقوموا بعمل المعالجة اللازمة .
4 - عمل مطابقة شهرية مع الموردين ( نفس الكلام زي مطابقة المقاول بالضبط )
5 - مطابقة أوامر الشراء مع فواتير الشراء … شركة المقاولات قبل ما تشتري أي مواد بترسل للمورد نموذج إسمه طلب شراء … فيه اسم الصنف والكمية والسعر … كل اللي عليك لما تجيلك فاتورة شراء إنك تطابقها مع أمر الشراء وتشوف فيه اختلافات ولا لأ … بعدها هتقوم بإرسال الفاتورة مع صورة أمر الشراء لمكتبك الرئيسي وهناك هم هيقوموا باللازم .
6 - مراجعة مستخلصات المقاولين المعده من قبل مدير المشروع ومطابقتها مع مطالبات المقاولين … فأي مقاول باطن بيشتغل مع شركتكم بيصرف فلوسه عن طريق حاجة اسمها مستخلص
اللي بيقوم بإعداد المستخلص ده هو مدير المشروع أو المهندس المختص ( مدني - انشائي - كهربائي - ميكانيكي )
انت هتقوم بس بعمل مراجعة حسابية لهذا المستخلص
الكميات انت مالك علاقة فيها لانها شغل المهندس … انت بس تتأكد من السعر الموجود ( عن طريق الرجوع لعقد المقاول ) وتتأكد من العمليات الحسابية ( الضرب والجمع والطرح وخلافه ) ويفضل انك ترفق مع المستخلص هذا صورة من عقد المقاول عشان زملائك في المكتب الرئيسي يعرفوا انك راجل فاهم وتسهل عليهم شغلهم
7 - نيجي بقي للشغل الثفيل … وهو مستخلص شركتك اللي من خلاله بتصرفوا مستحقاتكم من مالك المشروع اللي انتوا شغالين فيه … طبعا انت لازم تكون شاطر في الأكسل لأن شغلك كله هيكون عليه
والمستخلص ده بقي ياسيدي عبارة عن جدول بيوضح إسم البند وكميته طبقا للعقد وسعر الوحدة
بعدين ثلاث خانات رئيسية ( السابق - الحالي - الإجمالي ) ا
السابق هي القيمة اللي شركتك صرفتها من هذا البند خلال الفترة السابقة
والحالي هي القيمة اللي شركتك هتصرفها في هذا المستخلص
والاجمالي بالطبع هو السابق + الحالي
بعد ما تخلص المستخلص وتراجعه مزبوط ( لان الاكسل بيعمل فروق هللات ) لازم تتأكد من شغلك باستخدام الآلة الحاسبة لأن المالك لو كان جهة حكومية ممكن يرجعوا لك المستخلص عشان غلطة في هللة ( هذا حقيقي )
بعدها هيقوم مدير المشروع بتاعك بالتوقيع والختم وهيرسله لاستشاري المشروع هيراجعه ويوقع ويختم وبعدين هيرسله للمالك عشان يعتمده ويطلع شيك لشركتكم بقيمة المستخلص
دي نبذة بسيطة عن عمل محاسب المشروع… وبالطبع الكلام النظري لوحده مش كفاية عشان كده هرفق لك نماذج من المستخلص ومن كشوف تسوية العهد النقدية عشان تتضح الصورة قدامك
بس نصيحتي لك انك لازم تكون شاطر في الاكسل لان هذا هيسهل لك كثير
أما لو رحت بقي علي المكتب الرئيسي وهيكون شغلك هناك فماتقلقش من حاجة هم هيبتدوا يدولك شغل بسيط وواحدة واحدة هتتعلم كل حاجة
بس لازم يكون عندك الأساس مظبوط … يعني لازم تكون راسك مليانة محاسبة
لذلك هارفع لك بعض الملفات الخاصة بمحاسبة المقاولات تقرأها كويس وبإذن الله هتشعر انك أخذت فكرة ممتازة عن محاسبة المقاولات وربنا يوفقك
محاسب / وائل العراقي
أخى الكريم وائل العراقى قد قمت سيادتكم بمشاركة فعالة فى هذا الموضوع وقد وضعت فى المرفقات (كتاب عقود التشييد) وقد تبين لى وجود خطأ فى الصفحه 3 بالملف وذلك فى الأية الكريمة