المدقق “خلصني احبك” راجل مدقق خالص و هوه شهرته “خلصني احبك” فعلاً بس ده مش اسمه الحقيقي ، يا جماعة الراجل ده مش عادي و مش طبيعي ، عنده قدرات خارقة في عمله و عنده قاعدة بسيطة خالص هي دي منهجه في حياته العملية القاعدة هي " الشغلانة اللي حتاخد مني اكتر من يوم ما تلزمنيش يا اكسلنس "
خلصني احبك بدا يومه بكباية شاي خمسينة من قهوة حمؤه ( بيخلص فيها بيزنس كتير القهوة دي ) و بدأ التيليفون بتاعه يرن و كان على الخط واحد عايز شغلانة تدقيق
الحاج حنكورة ابو كرش : ألو الاستاذ “خلصني احبك” معاياً
خلصني : ايوه انا معاك اتفضل يا فندم أنت تؤمر
الحاج حنكورة ابو كرش : أنا اسمي الحاج حنكورة ابو كرش انا سمعت بيك يا استاذ خلصني انك شاطر و بتخلص اي شغلانة بسرعة
خلصني : الله يكرمك يا رب أحنا دايما بنعمل اللي علينا و الباقي على ربنا
الحاج حنكورة ابو كرش : من الاخر كده يا استاذ خلصني أنا عايز اخد تسهيلات من البنك و عايزك تظبطني في تقرير سريع كده اقدمه للبنك علشان التسهيلات دي ، تقدر تخلص التقرير ده امتى ؟
خلصني : انا تحت امرك أنا ممكن اطلع ليك التقرير بكرة انشاء الله
الحاج حنكورة ابو كرش : جميل يا ترى اتعابك كام يا استاذ خلصني ؟
خلصني : و الله شوف احنا مش حنختلف بس المهم ان كل حاجة تكون جاهزة
الحاج حنكورة ابو كرش : تقدر تبتدي الشغل امتى ؟
خلصني : النهاردة لو عايز
الحاج حنكورة ابو كرش : تمام تحب تيجي المكتب عندي و لا ابعتلك المستندات اللي عايزها
خلصني : لا مش لازم تتعب نفسك ابعت المستندات بالفاكس او بالبريد الالكتروني و الشغل بكره يكون جاهز
الحاج حنكورة ابو كرش : يا سلام يا استاذ خلصني انا كنت سامع عنك كتير بس فعلا خدماتك دي حتحللي مشكلة كبيرة واقع فيها
خلصني : احنا دايما بنعمل اللي علينا و الباقي كله على ربنا ، المهم انك تدعيلنا دعوة صالحة يبعد عننا ولاد الحلال ( اسف اقصد ولا الحرام )
الحاج حنكورة ابو كرش : اكيد يا استاذ خلصني بكرة حمر عليك ان شاء الله تكون التقارير جاهزة و تستلم اتعابك
خلصني : احنا تحت امرك في اي شغل
خلصني استلم المستندات و عنده على اللابتوب بتاعة فورمة حلوة بتاعة تقارير مضبطها على الاكسيل و بسرعة راح مضبط الارقام و عمل ملف كده و كده حط فيه شوية اجراءات و شوية كلام فارغ علشان قال يعني ايه انه عامل شغل
خلصني في نهاية اليوم مع مراته تفيدة بيعد الغلة و زعلان لأنه ما كسبش غير تلات او اربع تلاف في اليوم و بيكلم مراته بيقولها احنا لازم ننجز اكتر في الشغل ، اصلي ضغط الشغل عليا كتير يا تفيدة
الحاج حنكورة ابو كرش اياه اللي اخد التقارير من الاستاذ خلصني احبك مطبوعة و مختومة من مكتب اختم و شركاه للمحاسبة و المراجعة راح على البنك و هوه طاير من الفرح و قدم التقرير للموظف اللي اخد التقرير بلهفة لأنه حيخلص القرض للحاج حنكورة ابو كرش و طبعاً حياخد عمولة ( من الحاج حنكورة ابو كرش و البنك ) و الحاج حنكورة ابو كرش استلم الفلوس و خلصت الشغلانة و الكل فرحان و سعيد و مبسوط
بعد شهر من الفرح و الانبساط و الفخفخة بدأ الداينين يطالبوا الحاج حنكورة ابو كرش بفلوسهم و راحو رافعين قضايا عليه ، البنك اياه عرف الحكاية و راح فاتح تحقيق لأن التقارير المالية المدققة اللي قدمها الحاج حنكورة ابو كرش بتقول انه غني جداً و عنده فلوس مرطرطة و وضعه المالي احلى من الشرف مافيش
التحقيق تم مع الموظف المسئول و تم فتح بلاغ في النيابة و النيابة مسكت الاستاذ خلصني احبك و مسكت الحاج حنكورة ابو كرش و و كمان الموظف بتاع البنك و اتحطو سوا في الكاراكون
الحاج حنكورة ابو كرش : الله يخربيتك يا استاذ خلصني زي ما خربت بيتي
خلصني : ليه بس يا حج ما انا عملت اللي انت عايزة بالظبط
موظف البنك : يا جماعة صلوا على النبي
الحاج حنكورة ابو كرش : وديتني في داهية بتقاريرك ياض يا خلصني ، طب و ديني لانا مرتكب فيك جناية النهاردة
خلصني : ليه بس يا حج ده انا خدمتي معروفة للناس كلها و شعاري دايما في الحياة " اختم و انجز"
الحاج حنكورة ابو كرش: الله يخربيت اختامك و يخرب بيت اللي سمحلك تبوظ السوق و تورطني و تورط اللي زيي معاك
خلصني : جرى ايه يا حج ما انت اللي عايز كده ، السوق عايز كده و احنا ناس على باب الله ارزقية و بناكل عيش و ما فيش حد بيسأل
الحاج حنكورة ابو كرش : ده مش اكل عيش ياض يا خلصني ده اكل سحت و حرام و انت و اللي زيك هما مصيبتنا
خلصني : انا مش لوحدي اللي بعمل كده ، فيه كتير بيعملوا زيي بس انت اللي حظك دكر
الحاج حنكورة ابو كرش : انا اللي حظي دكر ، طب خد ( طاخ طوخ طيخ ، اه يا عيني ، الحقوني)
انتهي المشهد و البنك اللي كان بيطالب بفلوسه خسرها كلها و اعدمها في نهاية السنة و برضه الداينين رافعين قضايا في المحاكم و مافيش حد فيهم هياخد حاجة و الاستاذ خلصني اتحكم عليه و موظف البنك المرتشي برضه اتحكم عليه و اتحبسو كلهم و انتهى المشهد بخسارة الكل
الحكمة : انتبه جيداً لممارساتك المهنية قبل ان تتورط فما ستكسبه سريعاً تأكد انك ستخسره سريعاً و لو ان مدقق الحسابات من البداية قام بعمله بشكل مهني و ذكر في التقرير حقيقة الوضع المالي لعميله لما حدثت كل هذه المصائب و ربما كانت التقارير المالية السليمة ستوعي العميل بحقيقة مركزة و ستساعده على اتخاذ التدابير السليمة لانقاذ نفسه بشكل سليم
الفساد لا يبني الدول و لكن بالامانة و المحافظة على موارد الدول ستزدهر و تتقدم الشعوب و سيعيش الجميع في رخاء و سعادة